Penderfyniadau y Panel Grantiau

Penderfyniadau y Panel Grantiau

Panel Grantiau Seren Aur

Mae’r ceisiadau yn cael eu hystyried gan banel sefydlog, yn cynnwys budd-ddeiliaid allweddol Prosiect Seren Aur:

· CGGC (Cyngor Gweithredu Gwirfoddol Cymru) - Graham Benfield, Prif Weithredwr, a James Maiden, Ymddiriedolwr CGGC a Chydlynydd Rhwydwaith Sector Rhyngwladol Cymru (WISEN).

· Cynllun Cymru o Blaid Affrica Llywodraeth Cynulliad Cymru - Jon Townley, Pennaeth Tîm Cymru o Blaid Affrica

· Gweithgor Nodau Datblygu’r Mileniwm Cymdeithas Sifil Cymru - Peter Davies, Comisiynydd Datblygu Cynaliadwy

· BUILD (Building Understanding through International Links for Development) - John Whitaker, Ymddiriedolwr

Maent yn cyfarfod ar ddyddiadau penodol ar gyfer bob rownd grantiau (cliciwch yma ar gyfer dyddiadau 2009-10)

Sgorio Ceisiadau

I gynorthwyo penderfyniadau’r panel grantiau, bydd pob cais a dderbynnir yn mynd drwy broses sgorio drylwyr, a fydd yn:

· adnabod unrhyw ymgeiswyr sydd wedi’u heithrio neu’n anghymwys i ymgeisio dan reolau Cynllun Seren Aur (gweler y canllawiau ar y tudalennau ymgeisio), neu sydd dan waharddiad gan CGGC, Llywodraeth Cynulliad Cymru neu’r Comisiwn Elusennau am fethiannau cyfrifo neu gyfreithiol.

· asesu pa mor agos mae gweithgareddau bob argymhelliad yn ateb meini prawf penodol Cynllun Seren Aur.

· rhoi sgôr rhwng 0 a 5 i’r ymatebion i bob cwestiwn ar y ffurflen gais o ran cyflawni meini prawf a chanllawiau’r Cynllun Grantiau, o 0 = dim o gwbl, i 5 = ardderchog. Gellir gweld enghraifft o goldstarcommunities.webspring.org.uk/10109.file.dld href="http://goldstarcommunities.webspring.org.uk/10109.file.dld">ffurflen sgorio yma.

· Lle bo llawer gormod o alw (llawer mwy o ymgeiswyr nag arian ar gael), er mwyn galluogi’r arian i gyrraedd at gymaint o grwpiau ag sy’n bosibl, gellir cynnig canran o’r cyfanswm yr ymgeisir amdano - ee (o’r enghraifft cysylltiedig uchod) os yw’r sgôr yn 36/40 ar gais am £1500, gellid cynnig £1350.

· Os yw costau arfaethedig prosiect yn 'benodol', ac nad oes modd parhau gyda’r prosiect cyfan heb y swm llawn a ymgeisiwyd amdano, mae’n debygol mai ei wrthod fydd yr argymhelliad. Os oes nifer o rannau i’r prosiect arfaethedig, a bod angen cynnig grant llai fel a nodir uchod, gall y panel naill ai a) nodi pa weithgareddau y maent yn cynnig eu hariannu neu b) adael i’r ymgeiswyr benderfynu ar flaenoriaethau ar gyfer yr arian.

Cyfarfod y Panel Grantiau

· Cyflwynir dogfen gyfrinachol i’r panel grantiau ar gyfer bob rownd grantiau yn crynhoi POB cais, crynodeb o’r argymhellion, sgoriau cwestiynau a chyfanswm sgoriau, ac unrhyw broblem / mater cymhwyster. Hefyd ceir 'crynodeb dewisiadau' y bydd y panel grantiau yn ei ddefnyddio wrth benderfynu a) pa geisiadau i’w derbyn a’u gwrthod (ac am ba resymau); b) pa lefel o arian grant y dylid ei gynnig i bob prosiect; c) unrhyw amodau y dylid eu gosod (gweler isod).

Ceisiadau aflwyddiannus

Hysbysir yn ysgrifenedig a / neu drwy ebost o fewn wythnos i’r canlyniad, a bydd yr ohebiaeth hon yn cynnwys rhesymau’r panel dros wrthod. Noder, ni fydd argymhellion sy’n cael eu gwrthod yn cael eu hail ystyried gan y panel dan rowndiau ariannu yn y dyfodol oni bai eich bod yn derbyn gwahoddiad penodol i’w ail gyflwyno.

Cynigion Grant Di-amod

Hysbysir yn ysgrifenedig a / neu drwy ebost o fewn wythnos i’r canlyniad. Yna byddwch yn derbyn llythyr ffurfiol yn cynnig grant (gyda thelerau ac amodau) y dylid ei ddychwelyd, wedi’i lofnodi, at CGGC er mwyn i ni ryddhau’r grant i’r cyfrif banc a nodwyd yn eich cais.

Cynigion Amodol

Hysbysir yn ysgrifenedig a / neu drwy ebost o fewn wythnos i’r canlyniad, gyda’r telerau ac amodau penodol y mae’n rhaid i chi gytuno i’w cyflawni er mwyn derbyn arian gan CGGC. Os na fedrwch eu cyflawni neu gytuno arnynt, ni ellir rhoi’r grant a dyma ddiwedd y broses. Os fyddwch yn cytuno ar y cynnig amodol, yna byddwch yn derbyn llythyr cynnig grant ffurfiol (gyda thelerau ac amodau) y dylid ei ddychwelyd, wedi’i lofnodi, at CGGC er mwyn i ni ryddhau’r grant i’r cyfrif banc a nodwyd yn eich cais.

Apelio a / neu Gwynion

Dylid eu gwneud yn ysgrifenedig drwy Peter Davies, yn nodi’r union resymau (yn ôl telerau’r cynllun grant) pam yr hoffech i’r penderfyniad gael ei ailystyried gan y panel grantiau. Os wrthodwyd eich cais yn sgil safon / sgorio isel, gellir cynnig cyfle i chi ail lunio ac ail gyflwyno eich cais i’r rownd ariannu nesaf. Os bu canfyddiad anghywir bod eich cais tu allan i reolau a chanllawiau’r cynllun grant, dylech ddarparu tystiolaeth i gefnogi eich cais am ail ystyriaeth. Os yw eich cais yn parhau i fod tu allan i ffiniau’r cynllun grant, neu os bernir bod gwall sylfaenol ynddo, bydd penderfyniad y panel grantiau (wedi ailystyried) yn derfynol.